Vatnajökulsgarður? Nei takk!

Friðþæging malbiksfólksins vegna allra sinna umhverfisvandræða er að steypa saman öllum verstu hugmyndum um umhverfisvernd í vonlausan þjóðgarð norðan Vatnajökuls. Hugmyndir um garðinn eru gæfulausar frá byrjun. Ekki er ætlunin að bættar samgöngur verði hluti af ferlíkinu og hugmyndir um "aðgangshlið" og "enga truflun á landi" boða aðeins einangrun og stækkun eyðimarka. Það er svo sem eins og vænta mátti og sama hugmyndafræðin og býr að baki öðrum þjóðgörðum hérlendis. Hugsunin er að svona garðar séu aðeins fyrir fáa útvalda. Á stórum jeppum, með svifryk í augum, engar grænar hendur hvað þá þjónusta við ferðalanga. Þeir sem eru svo óheppnir að búa við ofríki þjóðgarðshugmynda af þessu tagi ættu að taka sig saman og segja meiningu sína á svona vitleysum. Nýir stjórnmálamenn sem gera út á þessi mál hafa ekkert í farteskinu nema fallegar myndir. Þurfa ekki vegi eða þjónustu enda fljúga þeir bara á staðinn, menga svolítið, velja fallegustu staðina og bestu dagana, eru svo farnir burt aftur á malbikið til að koma afurðunum í verð. Um að gera að láta svo einhverja aumingja hokra í einhverri ferðaþjónustuútgerð sem hefur hvorki samgöngur né afþreyingu til að gera rekstur mögulegan. Vatnajökulsgarð. Nei takk.

Athugasemdir

[Eiríkur Valsson (IP-tala skráð) 9.3.2007 kl. 11:03]

Sæll, Sigurjón Benediktsson

Þú ert enn sprækur og hæfilega kjaftfor. Góður! Ég er ekki nærri alltaf sammála þér, en þú nálgast málin oftast frá óhefðbundnu/skemmtilegu sjónarhorni. Vonandi lesa margir pistlana þína, þeir hrista upp í fólki.

Kveðja, Eiríkur Valsson