Leita í fréttum mbl.is

Flugvöllur - mbl 08.03.2001

Fimmtudaginn 8. mars, 2001 - Aðsent efni FlugvöllurBeint til Keflavíkurflugvallar Það er alveg óþarfi, segir Sigurjón Benediktsson, að fylla borgina af einhverju utanbæjarliði, sem gerir ekkert nema auka mengun og trufla umferð. 

Sigurjón Benediktsson

 

HVÍLÍK ánægja gagntók mig þegar ég fann loks vin og baráttufélaga í flugvallarmálinu svokallaða. Engan annan en borgarstjórann í Reykjavík! Hún skilur svo vel sálarkreppu sveitafólksins. Hún skilur, að sá sem er á faraldsfæti kærir sig ekki um að flengjast í bruðlferðum um borgina hennar og þvælast fyrir borgarbúum að óþörfu.

 

Reykjavík fyrir Reykvíkinga. Það líkar mér.

 

Beint út í buskann

Það er mjög aðlaðandi, að komast beint í mörg erlend sæluríki og á marga íslenska sælustaði frá einum og sama flugvellinum, Keflavíkurflugvelli.

 

Það er einmitt mikið fjárhagslegt atriði fyrir sveitirnar, að gestir okkar komist beint á fallegustu staðina. Áður en þeir eru búnir að eyða fé sínu og misnota tíma sinn, í enn einni borginni sem þarf að millilenda í, Reykjavík. Nóg er til af slíkum borgum.

 

Ferðalangar munu taka því með fögnuði, að lenda á alvöruflugvelli í Keflavík og geta farið beint þaðan, út í þessa miklu náttúru, sem borgarbúar eru jú sífellt að vernda og verja, af því að hún er það besta sem Ísland á. Þetta hafa margir borgarbúar nú loksins skilið, enda vilja menn hafa sína borg fyrir sig.

 

Alveg óþarfi er líka að fylla borgina af einhverju utanbæjarliði, sem gerir ekkert nema auka á mengunina í borginni, trufla umferð og offita endurnar á Tjörninni.

 

Suss, suss, borgin sefur

Þessi gamli herflugvöllur í Vatnsmýrinni er sem betur fer alltaf lokaður á nóttunni (milli 23.30 og sjö á morgnana má ekki lenda á vellinum) svo borgarbúar geta sofið vært úr sér vímuna án truflana frá vélarhljóðum.

 

Þetta er svo friðsælt. Líka er rétt að fuglarnir í Vatnsmýrinni fái frið og ró. Umhverfisverndarfíklarnir geta nú líka farið og friðað allt heila klabbið og völlinn með. Það er nú menningarlandslag í lagi.

 

Keflavík, nú komum við!

Hittumst því kát í Keflavík og ferðumst um landið, um öll þau vegagöng og brýr sem hægt er að byggja fyrir fé það, sem fæst fyrir Vatnsmýrina.

 

Náttúrufræðingarnir eru hvort eð er búnir að hrekja endurnar í burtu með byggingu glerhallar sinnar í mýri þessari. Nákvæmlega jafnmargar og Davíð hrakti af Tjörninni með byggingu ráðhússins á sínum tíma. Eða er það ekki?

 

Höfundur er tannlæknir á Húsavík.


Höfundur

Sigurjón Benediktsson
Sigurjón  Benediktsson

Ég er fyrrverandi tannlæknir á Húsavík til 37 ára, fyrrverandikennari við Tannlæknadeild Háskólans í Tromsö. Starfa nú sem óhaður tannlæknir á Íslandi. Er ekki í framboði. Netfangið mitt er: skefill@gmail.com

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 0
  • Sl. sólarhring: 1
  • Sl. viku: 41
  • Frá upphafi: 0

Annað

  • Innlit í dag: 0
  • Innlit sl. viku: 7
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband