Af sprungum og skælum - mbl 20.11.1997

Fimmtudaginn 20. nóvember, 1997 - Aðsent efniReykjavíkurvælið Af sprungum og skælum 

UPP Á síðkastið hefur runnið upp fyrir landslýð að allt er í rusli í Reykjavík. Ekki hefur linnt löngum grátgreinum um vandræði Reykvíkinga og raunir þeirra eru svo óskaplegar, að gamla landsbyggðarvælið hljómar sem vinalegt barnahjal í sanngjörnum samanburði.

 

Reykjavíkurvælið Af sprungum og skælum

 

Meðan vælukór Reykjavíkur grætur út styrki og er sammála um vesöld Reykjavíkur, telur Sigurjón Benediktsson ekki tilefni fyrir aðra að kvarta.

 

UPP Á síðkastið hefur runnið upp fyrir landslýð að allt er í rusli í Reykjavík. Ekki hefur linnt löngum grátgreinum um vandræði Reykvíkinga og raunir þeirra eru svo óskaplegar, að gamla landsbyggðarvælið hljómar sem vinalegt barnahjal í sanngjörnum samanburði.

 

Speki um sprungur

 

Vart hafði maður þerrað tárin eftir tvær sorglegar sjónvarpslýsingar á sprungu nokkurri í Borgarspítalanum, að sama sprungan var sýnd aftur og aftur á einhverri annarri sjónvarpsrás, með sama gamla góða grátkórinn til taks. Úrvinda eftir heimsóknir fréttamanna í sprungu Borgarspítalans, birtust síðan pattaralegir stjórnendur spítalans og sögðu okkur að þeir yrðu að fá 300500 milljónir til að loka sprungunni títtnefndu. Allt bendir nú til þess að framkvæmdavaldið sannfæri löggjafarvaldið um að bráðnauðsynlegt sé að loka nokkrum ómerkilegum sjúkrastofnunum og íþyngjandi skólum úti á landi til að reiða fram þessa aura. Verst, að ekki sé hægt að flytja sprunguna uppí Templarahöll þar sem stjórnendur ríkisspítala stjórna á mörgum hæðum, hún kæmi sér vel þegar kæmi að því að sannfæra almenning um viðhaldsþörfina þar.

 

Þingkonur þinga

 

Vegna vanda spítala í Reykjavík settust tvær þingkonur við ríkisstyrktan hljóðnema í útvarpi og voru sammála um að búið væri að bruðla svo mikið "úti á landi" að nú væri kominn tími til að Reykvíkingar fengju einhverja lækna- og spítalaþjónustu. Voru þingkonurnar á einu máli um, að eitthvað ægilegt myndi gerast ef ekki yrði brugðist skjótt við. Helst þyrfti að loka öllum sjúkrahúsum úti á landi í hvelli, nema kannske á Akureyri, enda þar góð bakrödd í reykvíska vælukórinn.

 

Þetta ægilega sem gæti gerst ef ...

 

Ógnin sem batt þingkonurnar réttsýnu svo stíft saman var fólgin í því að einhverjum dytti í hug að Reykjavík væri ekki Paradís og félli í þá gryfju að flytja eitthvað annað en til Reykavíkur! Stjórnmálamenn þjóðarinnar líta á það sem mestu ógn aldarinnar að samkeppni komi frá útlöndum um búsetu. Það væri svo óskaplega slæmt að vera í jaðarbyggð. Það væri bara ekki mönnum bjóðandi að eiga heima í jaðarbyggðinni Reykjavík og þurfa að standa í samkeppni við útlönd.

 

Lítið ráð

 

Niðurstaðan af því að hlusta á Reykjavíkurvælið er sú, að enginn ætti að flytja á hið ægilega jaðarsvæði, Reykjavík. Þar er allt í steik. Sprungnir spítalar, þunglyndar þingkonur og vonlaus samkeppni við útlönd. Engir almennilegir læknar, slappir stjórnendur og sjúkt samfélag.

 

Meðan vælukór Reykjavíkur grætur út styrk til samgöngubóta milli Reykjavíkur og Seltjarnarness, meðan skælt er yfir sprungum Borgarspítalans, meðan hálfur þingheimur og allir borgarfulltrúar eru sammála um vesöld Reykjavíkur, þá er ekki tilefni fyrir aðra að kvarta.

 

Höfundur er tannlæknir á Húsavík.

 

Sigurjón Benediktsson