Meðmælaganga til stuðnings álveri - mbl 28.08.2006

Mánudaginn 28. ágúst, 2006 - Innlendar fréttir Meðmælaganga til stuðnings álveri 

Á ANNAÐ hundrað manns gekk meðmælagöngu sem áhugamenn á Húsavík stóðu fyrir sl. laugardag til stuðnings fyrirhugaðri álversbyggingu og nýtingu á umhverfisvænni orku frá háhitasvæðum í héraðinu, í landi Bakka við Húsavík.

 

           

Morgunblaðið/Hafþór Hreiðarsson

           

Á annað hundrað manns gekk meðmælagöngu í landi Bakka.    

 

Á ANNAÐ hundrað manns gekk meðmælagöngu sem áhugamenn á Húsavík stóðu fyrir sl. laugardag til stuðnings fyrirhugaðri álversbyggingu og nýtingu á umhverfisvænni orku frá háhitasvæðum í héraðinu, í landi Bakka við Húsavík. Gengið var um Bakkalandið undir leiðsögn Sigurjóns Jóhannessonar, fv. skólastjóra, og harmonikkuleik annars fyrrverandi skólastjóra, Sigurðar Hallmarssonar. Tryggvi Finnsson, framkvæmdastjóri Atvinnuþróunarfélags Þingeyinga, sagði frá fyrirhuguðum framkvæmdum og fleiri tóku til máls og vitnuðu sumir m.a. í Einar Benediktsson skáld frá Héðinshöfða. Gengið var norður að Reyðará þar sem eru landamerki Húsavíkur og Tjörness, þaðan upp á þjóðveg og að minnismerki Einars Benediktssonar við Héðinshöfða. Þar lagði Sigurjón Benediktsson, einn forsvarsmanna göngunnar, blómsveig á minnismerki skáldsins sem hafði á sínum tíma stórar hugmyndir um atvinnusköpun á Íslandi.

 

Göngumenn hittu þrjá unga menn við minnismerkið sem vildu mótmæla fyrirhuguðum álversframkvæmdum og töldu jafnframt að hægt væri að nýta orkuna sem koma mun af Þeistareykjum með ýmsum öðrum hætti en til álframleiðslu.