Er Reykjavík rjúkandi rúst? - mbl 31.12.2002

Morgunblaðið 

Þriðjudaginn 31. desember, 2002 - Aðsent efni Er Reykjavík rjúkandi rúst? "Þar kveina menn og kvarta, og bjóða bara fram þingmenn!" 

           

ÞAÐ vekur ugg og vanlíðan að heyra í núverandi ástsælum borgarstjóra höfuðborgarinnar. Er ástandið virkilega svona slæmt? Aumingja Reykjavíkurborg! Það eru allir vondir við höfuðborgina okkar! Hefur eitthvað mistekist?

 

Það er sko ekki allt meinhægt í höfuðborginni.

 

Ó, nei.

 

Ástandið er svo svart, að borgarstjórinn sjálf þarf að fara inn á Alþingi til að passa höfuðborgina okkar! Ofsóknirnar á hendur höfuðborginni og hvernig hún er hlunnfarin er svo heiftarlegt, að bestu börn borgarinnar verða að fórna sér til að sitja við Austurvöll og gæta hagsmuna vesalinganna, sem Reykjavík búa. Það hlýtur allt að vera að fara til óvina jólanna, ljóssins liðhlaupa, fyrst svona er komið.

 

Já, já, auðvitað hjálpum við ykkur. Við erum vel aflögufær eftir ofrausn síðustu ára. Nú síðast gáfum við ykkur eftir alla þessa þingmenn og það hlýtur að koma sér vel. Stuttbuxnalið allra flokka er nú himinsælt. Allir eru að verða þingmenn og syngja hátt með borgarstjóra í vælukórnum. Mikið skelfing virðist lífið vera erfitt. Þrátt fyrir að stofna eigi öll þessu litlu sætu þekkingarþorp til að taka við öllum litlu velgefnu börnunum af landsbyggðinni, þá er allt í steik! Hvar er glansmyndin okkar?

 

En ekki koma til okkar, "plíííís"!!!

Ef ástandið er svona svart hjá ykkur, þá vinsamlegast látið okkur í friði. Við höfum elskað ykkur og dáð, klætt og fætt og fóðrað. Komið reglulega til ykkar með kvótaaura okkar og sparifé allt. Við höfum gefið einbýlishús okkar og góðar íbúðir til að fá að búa í nágrenni við ykkur.

 

Að vísu í kjallaraholum og ósamþykktum hálfbyggðum íbúðum. En allt vegna þess að við trúðum. Við trúðum því, að þið væruð á þröskuldi Paradísar og við, kolbítar nútímans, værum aðeins landsbyggðarvælarar og okkar æðsti draumur var að þið tækjuð við börnum okkar og leyfðuð þeim að búa hjá ykkur í þekkingarþorpunum fallegu.

 

Ó, ó og æ, æ, svo er þetta allt bara blekking!! Hver á að kyssa á bágtið?

 

Eftir Sigurjón Benediktsson

 

Höfundur er tannlæknir á Húsavík.